Mei Arwetskulleger, de Klaus, wor in de 80er Johre uf der Popa-Schapka-Fakultät in Temeswar. Dort ware net norr so Studente wie er, die wu versucht hun, die Welt hinner der jugoslawisch Grenz zu studeere, sondern aah so genannte Dauerstudente, die wu meh drin wie draus ware. Un die hatte längst alle Respekt vor de Unteroffizeere, die wu dort Professore ware, abgeleet. Dass vun dee Supasche* noch owwedruf vill dabei ware, die wu vum Herrgott net grad mit außergeweehnlicher Intelligenz bschengt ware, hot die Sach net oonfacher, awwer drum um so lusticher gemach.

Wie de Klaus verzählt hot, hun se efter mol zu der Priefung misse. Die hun no im Gfängnis – Pardon, in der Fakultät – immer glei ganze Transporte zammgstellt un die Gfangne – na was is dann jetz?, ich moon nateerlich die Studente – ufs Gericht – jetz is awwer wirklich Zeit, ich hun selbstverständlich gemoont, vor die Priefungskommission – gebrung. Des is no so abgelaaf, dass immer zwaa un zwaa Studente mit Handschelle zammgekuppelt sin wor – net dass die schwul gewen wäre, norr dass se sich halt net aus de Aue vleere* – un je, ufs odder ins Auto. E jeder Student hat e Nummre ghat un do hun die zwaa Professore, e Sergent major* un e Plutonier*, immer owachtgewwe, dass des mit de Nummre net schief geht, un sich alles genau ufgschrieb. De Plutonier hot die Nummre paarweis vorgeles un de Sergent major hot die Studente so gepaart. Un weil der Plutonier schun e Mann mit vill Berufserfahrung war, hot er des so gemach, dass die Studente zammkum sin, die wu aah vor die gleich Priefungskommission hun misse.

Asso son mer mol so, Nr. 207 mit Nr. 303 un Nr. 70 mit Nr. 406 hun zu dee gheert, die wu ehre Meinungsverschiedenheite mit annre Leit ziemlich handfest ausgetra hun; Nr. 217 un Nr. 128 sowie Nr. 578 un Nr. 213 hun unbedingt ehre Studium im Ausland mache wolle un misse sich forr des jetz vor der Auslandspriefungskommission rechtfertiche. Un so is des weiter gang, bis es Lastauto odder die Dubitza* voll wor. Is jo zimmlich logisch des Ganze. Es Problem war norr, dass de Plutonier un de Sergent major net grad die beste Freinde ware, wie des unner Arwetskullegre halt efter so is.

Un des hot e Student, der wu e Priefung zum „Studium schwer zugänglichen fremden Eigentums“, wie merr des in der Hochschulsproch genennt hot, abzuleje hat ghat, gewisst. Der Mann war e echter Langzeitstudent un hot alle Tricks aus’m wirkliche Lewe gekennt. So war zum Beispiel e Handschelleschloss forr de gute Mann e echtes Spillzeich, mit dem wu merr sich die Zeit vertreiwe kann.

In Temeswar war die Popa-Schapka-Fakultät und de Sitz vun der Priefungskommission net weit ausnanner. Des ware norr ooni odder zwaa Gasse weit, forr e Auto e Wech vun vleicht finef Minute. Forr unser begabte Langzeitstudent war des awwer weit genuch, dass er mit’re Hoorspangel aus Droht alle Handschelleschlesser ufgsperrt hot un aah wedder zu. Norr war jetzt de Student Nr. 207 mi’m Nr. 213, de 217 mi’m 303 un so weider verkuppelt.

Bei dee ville tausend Studente uf der Fakultät hun die Professore sich nateerlich die Gsichter net all merke kenne. Des war aah gar net notwennich. Sie hatte jo die Nummre. Im Hof vun der Priefungskommission onkumm, hot de Plutonier sich mit seiner ganzer Autorität un mi’m Zettel in der Hand hinrem Auto in Stellung gebrung un mit’re Stimm, die wu in dem viereckiche Innehof ongschwoll is wie e Dunner, die Studentenummre regelrecht rausgegraascht.

207 und 303 - kumm is awwer de 207 mi’m 213 un de 303 mi’m 217. So is des e Weil weider gang. De Plutonier is immer blasser wor un sei Stimm hot vun Mol zu Mol haasricher geklung. Die arme Studente hun norr sei Befehl ausgfeehrt. Uf der List hot doch alles gstimmt un er war doch dabei, wie de Sergent major die Paare zammgstellt hot. Un wann er in die unschulliche Gsichter vun de arme Studente gschaut hot... Des kann norr am Sergent major leie... Der kann mit dee große Zahle doch gar nicks onfange...

No is es lossgang: Măi boule, idiotule, nemernicule, nu şti să număr până la trei, mă faci de ruşine, te raportez la maior să te bage la arest...*

Die Studente hun norr gschaut, todernst un voller Mitleid mit de zwaa Professore, die vor'me schier unleesbare Problem gstan hun.



*Worterklärungen:

- Supasche = Unteroffiziere
- vleere = verlieren
- Sergent major (rumänisch)) = Feldwebel
- Plutonier (rumänisch) = Oberfeldwebel
- Dubitza (rumänisch: dubiÈ›ă) = geschlossener Transportwagen für Gefangene
- Măi boule, idiotule, nemernicule, nu şti să număr până la trei, mă faci de ruşine, te raportez la maior să te bage la arest...(rumänisch) - Ochse, Idiot, Nichtsnutz, kannst nicht bis drei zählen, machst mich lächerlich, ich werde dich beim Major anzeigen, damit er dich ins Arest steckt...