Selmols war die Welt
Noch in ehre Fuche,
Merr hot Ost un West gekennt:
Do war’s Beese, dort es Gude.

Schun paar Johr speder
Hun mer uf’m Storz gstann
Un ausproweert, wer weider
In’s Gärtche brunze kann.

E Schachbreet mit Heiser
War unser Spillplatz.
Mer ware die Leifer
In de Gasse vun Johrmark.

Die Welt war vill greeßer wie heit,
De Wassergrawe e Strom,
Truckne Schiffe die Ställ ohne Schwein,
Un die Kreisstadt e Metropol.

Mit de Nochberschmädcher
Hun mer Dokterches gspillt.
Des war halt selmols
De Aufklärungsstil.

Annre Spillregle awwer
Hun uns äfter net gepasst,
Sie ware meistens forr große
Un net forr kloone Mensche gemach.

Irgendwann sin mer stumpich wor,
De Kersche Nick,
Hun die Leit verzählt,
Spillt norr uf’s Ohr.

Was noher kumm is,
War geistichi Selbststännichkeit.
Des hot so manchem net gepasst
Vun de Johrmarker Leit.

Die nächst Phase
Will ich net kommenteere.
Ich hoff, unser Weiwer
Sin uns gnädich.

Die Johre sin gang,
Ob lang, ob korz.
Wie meecht unser Wettkampf
Heit ausschaue uf’m Storz?


[Uf der Schanz, 2002]