I

Vor langer, langer Zeit hot mol in’re tiefer Ebene e klooner, awwer tichticher Volksstamm gelebt. A’me scheene Tach is es ah dem Stamm so gang, wie’s schun vill Volksstämm, ja sogar ganze Völker un Weltreiche gang is: Er hot unergehn misse.

So e Volk odder Volksstamm verschwind jo net vun heit uf morje. Des is e langer, manchesmol hunnerte Johr dauernder Prozess. Bei dem Volksstamm aus der tief Ebene is des awwer schun etwas schneller gang, weil halt net so vill Leit zum Sterwe do ware.

De letzt Mensch, der wu dort noch gelebt hot, war e uralter Mann. Meyerszky war sei Nome. Er hot selwer nemmi gewisst, wivl Johr er uf’m Buckl ghatt hat, weil selmols hot noch nimand lese un schreiwe kenne un vun Geburtsscheine war iwerhaupt ka Redd. Es is awwer iwerliwert, dass er 969 Johr alt gewen sein soll.

In Wirklichkeit hot er sich schun lang noh der Ewichkeit gsehnt. Es Lewe so loonich, ohne sei Landsleit, hot’m nemmi recht gfall. Un doch war’s’m net alles oons, wie er immer äfter ans Sterwe hot denke misse. Er hätt halt geere gewisst, was nohher, noh’m Tod, so alles uf’ne zukummt.

Es war a’me Heiliche Owed, so um die Zeit, wu heit zu Tach die Leit in die Mette gehn. Drauß hot e färchterlicher Schneesturm getobt. Im Rahfang hot’s gheilt, wie wann alle beese Geister lossgeriss wäre. De Vedder* Meyerszky hot uf seim Diwan gsitzt, e heiße Gliehwein getrunck, sei Pheif geraucht un an all die Mensche gedenkt, die wu er in seim lange Lewe mol gekennt hot. Scheene un wieschte Bilder sin’m dorch de Kopp gang, un Ängste... Naa, Ängste hat er net ghatt, wann er ah loonich uf der Welt war. Wer so vill Krieche, Gfangenschafte, Verschleppunge un Fluchte iwerstann hot, der fercht sich nemmi.

Verschrock is’r awwer no doch, unser guter Meyerszky. Er hatt sei Aue schun längst fest zu ghatt – forr die Bilder, die wu er siehn hot wolle, hot merr ka uffne Aue gebreicht -, wie uf mol e klooner, schneeweißer Engel in sei warmi Stubb gflo kumm is.

„Fürchte dich nicht“, hot der freindlich gsaat. „Du wirst bald nicht mehr allein sein. Alle deine Landsleute, die in den vergangenen 50 Jahren gestorben sind, konnten nicht mehr im Himmel aufgenommen werden. Es war nach dem letzten großen Krieg eben kein Platz mehr vorhanden. Darum hat man sie dazu überredet, sich freiwillig für den Probelauf einer neuen Zeitmaschine zur Verfügung zu stellen. Diese Maschine hat sie dann in eine neue Zeit, die mehr als tausend Jahre nach unserer Zeitrechnung liegt, katapultiert. Dort leben sie jetzt alle glücklich und sorgenfrei in einem versorgten Zustand.“

II

Wie er de näckste Morjet wackrich is wor, war unser Vedder Meyerszky e annre Mensch; zwar noch immer alt, ja sogar sehr alt, de ältst Mensch in der nei Welt im versorgten Zustand, awwer er hot lese un schreiwe kenne, hot e Zeitung kriet un Fernseh kenne schaue, wie wann er sei ganzes Lewe nicks annres gemach hätt. Un er hot sehr schnell kapeert, dass alles Geld kost in der nei Welt. So lang wie alles sei Ordnung hot, kann merr jo aah gut damit lewe. Er war sogar recht stolz, de Vedder Meyerszky, weil er jetz aah Besitzer vu’me Bankkonto war. Vun dem hot die Regierung sich gholl, was se zum Versorje vun ehre Staatsbürger so alles gebreicht hot.

Merr muss schun soon, des Ganze hot ah wirklich e Kopp un e Arsch ghatt. Alles war i’me Vertrach geregelt. Es hot zum Beispiel forr 110 Leumark (so hot’s Geld in dem Staat im versorgten Zustand ghaaß) im Monat unner annrem aah vier kostenlose Fahrte mi’m volkseigne Mikrobus gewwe: zum Inkaafe, zum Balweere*, uf de Kerchuf* un in die Majereih*.

Jetz war’s awwer so, dass unser Vedder Meyerszky nie zum Balweere hot misse, weil er e scheeni, großi Vollglatze ghatt hat. Zum Inkaafe is er fast nie gfahr. Es Esse in der Kantin war wirklich sehr gut un manchesmol hot’s sogar noch etwas gewwe, was ne an sei Lewe in der alt Welt erinnert hot. Er war aah ka bsonders gsellicher Mensch, meh so e Partymuffel, wie merr heit saat. Drum is er aah nie mit in die Majereih, Senioretreffe hot merr des in der Welt im versorgten Zustand genennt, gfahr. Ja, un uf de Kerchuf hot er aah net wolle. Die fremde Gräwer hun ne iwerhaupt net intressert.

Es is unsrem gute Vedder Meyerszky awwer nie ingfall die 110 Leumark net zu zahle. Des is halt e Solidaritätsbeitrag forr die annre Staatsbürger, hot er sich gedenkt, un war sogar froh, so forr annre Leit etwas Gutes mache zu kenne.

Noh’me gute Johr hot de Vedder Meyerszky a’me scheene Tach stärkes Zännweh kriet, besser gsaat, sei oonzicher Zannt hot’m schrecklich weh geton. Es hot zum Vrucktwerre gezoo un gekloppt. Er hot glei im Gsundheitsministerium ongeruf un die Beamtin hot’m aah sofort de volkseigene Mikrobus gschickt. Der hot ne zum Zahnarzt gfehrt. Es war norr zwaa, drei Stroße weit zu fahre.

Mei, in der nei Zeit war des doch ka Problem meh, des Zännweh aus der Welt zu schaffe. Dreimol hot de Vedder Meyerszky awwer schun zum Herr Doktor misse. Es eerschte Mol is de Eiter vun der Worzel vertrieb wor, no paar Täch is de letzt Zannt, de wu’s iwerhaupt aus der alt Welt in der nei Welt noch gewwe hot, geriss wor, un bei der dritt Fisit hot de Dokter nohgschaut, ob des Loch verhaalt war.

Ende gut, alles gut. So wenichstens hot unser guter Vedder Meyerszky sich gedenkt un die nei Zeit iwwer de Schelle Keenich gelobt. So ohne mer der nicks hot er sei annre Zänn in der alt Welt net losskriet ghatt.

Große Aue hot er awwer gemach, wie am Monatsenn e Rechnung vum Verkehrsministerium in seim Postkaste gelee hot. Un die Aue sin noch greeßer wor, wie er geles hot: „Für drei Fahrten mit dem volkseigenen Mikrobus stellen wir Ihnen 149,99 Leumark in Rechnung. Wir bitten Sie, Ihre Schuld innerhalb von 14 Tagen zu begleichen.“ Unser alter Kämpfer Meyerszky is schnurstracks zum Telefon un hot sich de Verkehrsminister mol vorgeknäppelt.

Der hot sich awwer net beeindrucke geloss un dee ufgeregte Reklamant glei ins richtiche Bild gsetzt: „Herr Meyerszky, in ihrem Vertrag zur Benutzung des volkseigenen Mikrobusses ist keine Fahrt zum Zahnarzt aufgeführt. Infolgedessen müssen Sie die absolvierten Fahrten auch bezahlen. Alles andere wäre ein Vertragsbruch, der uns leider zur Anrufung eines Gerichts zwingen würde.“

De Vedder Methusalem hot’m Minister erklärt, dass er de volkseigene Mikrobus forr die im Vertrach vorgsiehne Fahrte iwerhaupt nie benutzt hot un sich jetz es eerschte un vleicht ah es letzte Mol fahre geloss hot, obzwar er doch schun meh wie e Johr sei 110 Leumark Monat forr Monat zahlt. De Herr Minister hot ne awwer ufgeklärt, wie des mit de Gsetzer i’me Lewe im versorgten Zustand so is.

„Es tut mir sehr leid, Herr Meyerszky, aber das hat schon alles so seine Richtigkeit. Sie können jedoch gegen diesen Vertrag ein Verfahren anstreben und wenn die Gerichte Ihnen Recht geben, dann werden wir ein Gesetzänderungsverfahren in die Wege leiten müssen.“

Des war no forr unser alte Kämpfer aus der anner Zeit doch e bissje zu vill. Er is sehr nohdenklich, um net zu soon tiefsinnich wor. Was is des forr e Welt, die wu vun außewennich so glanzt un innewennich so kloonkareert is?

In der alt Welt hätt er jetz wahrscheinlich sei Lanz un sei Säwl* gholl un wär in seine alte Johre nochmol geger so e unverschämti Abzockerei ins Feld gezo. Awwer do in dem Lewe im versorgten Zustand misst er ganz neie Kampfmethode lerne un do dezu fehlt’m doch schun die Kraft.

So hot er gsitzt un nohgedenkt, unser bedauernswerter Meyerszky. Un er is mied wor dabei. Sei Aue sin’m zugfall un ... uf mol hot er e leichtes Liftche gspeert. Sei klooner Engel is dorch’s Zimmer gschwebt. Sie hun sich wie gute alte Freinde begrießt un de Engel hot glei gsiehn, dass em Vedder Meyerszky etwas iwer die Lewwer gelaaf is.

Der alt Mann hot sich aah bitter iwer die Sitte in seim neie Lewe beklaat. De Engl hot’m gedullich zughorcht un no gsaat: „Mein lieber Meyerszky, deine Situation bedrückt mich sehr. Aber leider kann ich dir hier im Leben im versorgten Zustand nicht helfen. Es ist eben so, dass die meisten Menschen nur noch scheinheilig sind und in Wirklichkeit nicht mehr an uns glauben, so dass wir auch keinen Einfluss mehr auf sie haben. Das gilt ganz besonders für viele Minister und Regierungsbeamte. Die predigen zwar Wasser, ja einige sogar Weihwasser, trinken selber aber nur Whisky und Brandy. Das Einzige, das ich für dich tun könnte, wäre, eine Reise zurück in deine alte Zeit zu organisieren.“

„Naa“, hot de Vedder Meyerszky druf gsaat, „ich sin zum Jachte* schun zu alt, un jetz, wu ich aah mei letzte Zannt vlor hun, kann ich neml meh es zarteste Reh- odder Hasefleisch kaue. So gere wie ich mich aah noch an mei alti Zeit erinner, zrick will ich nemmi. Vleicht gebt’s awwer jetz schun im Himmel e leere Platz. Es muss jo net glei im Petrus seiner Näh sein. Du waaßt doch, ich war noch nie sehr onspruchsvoll. De Wech dorthin werr ich awwer schwerlich zahle kenne. Die hun mer e scheene Batze vun meim gspartes Geld forr de Mikrobus gholl un was noch uf’m Konto is, werd net reiche.“

„Ich werde mein Möglichstes tun“, hot de kloon Engel druf gsaat, „und kosten wird dich das natürlich nichts. Im Jenseits spielt Geld überhaupt keine Rolle mehr.“

III

Am nächste Tach hun de Finanz- un de Bestattungsminister vun der Republik im versorgten Zustand zammgsitzt un iwerprieft, ob uf’m Sparbuch vum iwerraschend verstorbne Meyerszky noch was druf war. Schließlich un endlich soll jo ah e jeder Bürger e christliche Abgang in die Ewigkeit krien.

Die zwaa Ministre ware mi’m Resultat ganz zufriede un de Finanzminister hot mit pietätvoller Stimm zum Bestattungsminister gsaat: „Es reicht auch noch für einen Leichenschmaus.“


[Ingolstadt, 2000]


*Worterklärungen:
- Vedder = Benennung eines älteren Mannes (Herr Meyerszky)
- Balweere = Friseur
- Kerchuf = Friedhof
- Majereih = geselliges Treffen
- Säwl = Säbel
- Jachte = Jagen