De Mesmer vun Kniis is net norr groß un stärk. Wann er aah manchesmol e bissje jähzornich sein kann, so merkt merr doch im Umgang mit ehm, dass er im Grund e seelguter Kerl is, der wu schnell Mitleid mit de arme Schluckre hot. Des Mitgfiel is’m ongebor. Er hot’s schun gspeert un deno ghandelt, wie er noch e klooner, etwa vierjähricher Bu war.

A’me scheene Tach hot sei Vatter zwaa neie Goldbricke uf zwaa Backezänn kriet. Awwer schun am Nammitach hot de Tach ongfang sich forr ehne inzutriewe. Die zwaa Zänn unner de goldne Bricke hun immer weher geton. Der Mann is ball fruckt wor un hot des gemach, was merr schun frieher bei großem Zännweh gemach hot: Er hot die Rackiflasch gholl un gut gspielt un gschlickt, un nomol gspielt un gschlickt, un nomol, un so oft, bis er de Kopp uf de Tisch geleet hot un ingschlof is. Dass der Racki aah onstännich wirke kann, hatt er awwer schun vorher die zwaa Goldbricke runnergezo ghat un se uf de Tisch geleet.

Seim kloone Bu hot er wirklich laad geton. Der hot sehr wohl kapeert, was seim Vatter so große Schmerze bereit. Er hot aah net lang studeert un hot die zwaa Bricke vum Tisch ghol, is in de Hof gelaaf un hot se in Richtung Tenn geworf. Liewer selle die Hinkle se ufpicke, wie dass sei Vatter nochmol so vill ausstehn muss.

Wie der Mann wackrich is wor, hat’s Zännweh zwar wirklich nohgeloss, awwer aah die zwaa Krone aus Gold ware futsch. Sei kloone Bu hot die Aufregung gar net verstann, die wu do uf mol im Haus war un hot brav verzählt, wie er die zwaa kloone Dinger uf’s Tenn de Hinkle hingeworf hot. Alles was im Haus Aue un Verstand hat ghat, hot uf’m Tenn no de Bricke gsucht, sogar uf’m Misthaufe. Alles war umesunst. Es is wirklich nicks iwrich geblieb, wie die siwe Hinkle uf’m Tenn zu schlachte, mit der Hoffnung, dass oons odder zwaa die Bricke im Maa hun.

Eerscht wie die Hinkle umesunst ehre Lewe hun losse misse, is es jemand vun de Große ingfall, dass der kloon Bu die Krone vleicht gar net iwer de Tennezaun, sondern norr an de Zaun geworf hot. Un so war’s no aah: Die Zänn hun vor’m Zaun im Hof im Gras gelee. Des hot de Hinkle nicks meh gholf. Der siwetfach Hinklsmord war vollbracht un de kloon Bu, der wu irgendwann Meesmer in Kniis is wor, hot die nächste Täch vill Schlegle gess. Die hot er aah gebreicht, weil forr die Glocke leide hot merr frieher groß un stärk sein misse. Un des is de Meesmer vun Kniis no aah wor.