Kumm, sitze mer uns uf die Owebank,
Die halt uns die Buckle scheen warm.
Holle mer uns an de Hänn un verzähle vun frieher,
Vum Pheife un Bussle, vum Wachse und Bliee.

Kumm, sitze mer uns uf die Owebank,
Mei Gedanke sin wie de Owed so lang.
Sie gehn weit un weider zrick:
Irgendwann war aah des Haus e armi Hitt.

Kumm, sitze mer uns uf die Owebank,
Ich les der die Zukunft aus der Hand:
Du werscht deine Kinn mol erkläre misse,
Daß mer uf’re Owebank sogar hot känne sitze.


[Uf der Schanz, 1992]


(Worterklärungen: Owebank = Ofenbank; Pheife = Pfeifen; weider = weiter; Hitt = Hütte; werscht = wirst)