Die Männer hun frieher beim Pannert im Wertshaus net norr getrunk un Kegl gschiwlt. Sie hun aah fleißich Karte gspillt. De Ludwichs Pascht, im Dorf bekannt als Uhremacher, war aah efter mit vun der Partie. Wie des beim Kartespille schun so is, hot merr do net ständich uf die Uhr gschaut un an’s Hoomgehn gedenkt.

Es war a’me verreente Herbsttach – im Summer war forr’s Karte* nateerlich kaum Zeit – un die Karte sin beim Pannert rum gang. Net loonich - mit de Glässer, versteht sich. Un ’s is spät wor an dem Owed. Die ville Gspritzte hun em Uhremacher uf die Blos gedrickt. Er is naus uf’s Tenn un hot sich unner de Schoppedach gstellt, um sich zu erleichtre. De Schopp war frieher uf der Tenneseit ganz uff. Es hot noch immer gereent un newer ehm am Haus is die Dachtrapp* gang. Dachrinne hot’s selmols noch kooni gewwe. Des hot ganz scheen gerauscht.

Aah mer moderne Männer kenne doch des Gfiel, wann’s beim Erleichtre im Pissoir so saftich rauscht. No geht’s am doch glei besser. Es gebt awwer aah Männer, bei dee geht’s glei gar net, wann de Newermann ’s so richtich rausche losst. Zu dee hot de Johrmarker Uhremacher awwer net gheert. Der hatt schun e gsundes Selbstbewusstsein ghat un des Plätschre vun der Dachtrapp hot’m so gut geton, dass er gar net bemerkt hot, dass er eigentlich mit seiner Arwet schun längst fertich war.

E veertel Stunn speeder is de Hans aah zum Erleichtre kumm un hot sich newer de Pascht gstellt.

- Na werscht du gar nemi fertich, hot er de Pascht gfroot.
- Naa, hot der geantwort, ich waaß aah net, was do loss is, ich moon, ich laaf aus.

Ob de Uhremacher dort gstan hot, bis es nohgeloss hot zu reene, hot nimand forr die Nohwelt festghall.



Worterklärungen*
forr’s Karte = zum Kartenspielen
Dachtrapp = Dachvorbau ohne Dachrinne