Mei Otta hot net tanze känne. Sei Fieß ware aus Holz. An de Knie ware se mit Schaneerbänner bschla. Sei Fieß aus Knoche un Fleisch un Blut hot er forr Führer, Volk un Vaterland oppre misse.

Wieso mer des grad jetz infallt? Weil Fasching is un ich die Schäffler gsiehn hun tanze. Sie tanze norr alle siwe Johr, un seit mei Otta sei Holzfieß forr immer abgschnallt un ausgezoo hot, hun se schun sechsmol getanzt.

Die Schäffler, des sin wuannerscht die Böttcher, odder die Büttner, die Küfer un die Binder. Bei uns drunne im Banat ware’s die Fassbinder. Mei Otta war Fassbinder un net norr sei Werk war aus Holz un Eise, ah sei Fieß. Un mit dee hot er net tanze känne, was forr e Fassbinder im Banat aah net so wichtich war wie do bei uns in Bayern.

Die mache aah kaum noch Fässer. Zu der Bayrisch Schäfflerinnung gheere noch 20 Fassbinder. Frieher war des nateerlich annerscht. Norr bei uns Uf der Schanz ware angeblich im Johr 1529 ganze 426 Lagerfässer registrert. 5000 Hektoliter Bier solle do drin gewen sin. Die Schanzer ware halt schun immer trinkfeste Mannsbilder.

Ob mei Otta aah gewisst hot, dass die Schäffler in der Fasching tanze, waaß ich net. Die deitsche Saldade bei uns im Haus ware uf jede Fall ka Bayre, un wer waaß, ob die vun dem bayrische Brauch etwas gewisst hun.

Lang genuch gebt’s dee Brauch awwer schun uf jede Fall. 1517 hot merr gschrieb. In München war die Pest grat rum un die Iwrichgebliebne sin un sin net aus ehre Heiser kumm. Norr eme Schäffler is es zu dumm kumm. Er is mit paar Kumrade uf de Maark un hot Musik gemach un dazu getanzt. Die Leit sin zammgelaaf un ’s Lewe is weitergang.

Des hun die Schäffler no alle siwe Johr so gemach, weil merr gemerkt hatt, dass die Pest so ungefähr alle siwe Johr mol ausbrecht. Nateerlich hot sich seit selmols am Schäfflertanz vill verännert, awwer wann merr bedenkt, dass die heidich Schäfflertracht aus’m Johr 1872 stammt, no kann merr sich schun vorstelle, was Tradition bedeit. Un aah de Tanz selwer – es is jo e reiner Männertanz, bei dem bis 1963 norr Schäffler-Junggselle mitmache hun därfe – is bestimmt noch net so vorgfeehrt wor wie heit. Do gebts e Einmarsch, Begrießung, Laubenpolonaise, langi Laube, rundi Laube, Summerhaus, e großi Acht, e Kreiz, e Kron, e Kontratanz un zum Schluss e Rafeschwung.

Wann ich gut gezählt hun, ware 34 Männer aus drei Generatione an dem Schäfflertanz beteilicht. Die Blechmusik hot ununnerbroch die Melodie „Oba heid is koid“ gspillt.

Ich hun ah Gänsehaut kriet, wie mer dabei mei Otta ingfall is. Er hätt do net mittanze känne. Sei Fieß ware aus Holz. Forrwas?


Worterklärungen: Schaneerbänner = Scharnierbänder
oppre = opfern
wuannerscht = woanders
gheere = gehören
merr = man
eme = einem
selmols = damals
heidich = heutig
forrwas = warum


LESUNG